တော်တော်ရီရတဲ့ ဟေလာရီ

မစ္စတာဂျိုးရဲ့ လူထုထောက်ခံမှု ရုပ်ပျက်ဆင်းပျက် ကျဆင်းနေတဲ့အပေါ်မှာ ဟေလာရီက လူထုကို ဂျိုးရဲ့ လုပ်ဆောင်ချက်တွေအပေါ် ကျေးဇူးမသိဘူးလို့ စွပ်စွဲလိုက်ပြီး ဆိုရှယ် မီဒီယာကို အပြစ်တင်လိုက်တဲ့အကြောင်း MSNBC ရဲ့ Rachel Maddow ရှိုးကနေ ကနေ့ ပြောသွားပါတယ်။

ဟေလာရီက ဒီမိုကရေစီဆိုတာတော့ ဒီလိုပဲရှုပ်တာပဲ၊ သူ့အမြင်မှာ လူတော်တော်များများက ဥပဒေပြုလုပ်ငန်းစဥ်ရဲ့ ရှုပ်ထွေးတာတွေကို စိတ်အနှောက်အယှက် ဖြစ်နေကြတယ်လို့ ထင်ကြောင်း၊ လူတွေ ကျေးဇူးမတင်တာက တနှစ်အတွင်းမှာ ဘိုင်ဒန်အစိုးရက ဥပဒေ အကြီးကြီး ၂ခု ထုတ်လိုက်တာ၊ အဲဒီလိုဖြစ်ဖို့ အောက်လွှတ်တော်ရော အထက်လွှတ်တော်ကိုပါ ဖြတ်ရတာဖြစ်ပြီး နောက်အကြီးကြီးတခုက အောက်လွှတ်တော်ကို ဖြတ်ပြီးသွားပြီး အထက်လွှတ်တော်ကို မကြာခင်ရောက်တော့မှာ၊ ဒါတွေက နဲနဲနောနော အောင်မြင်မှုမဟုတ်ဘူး၊ အဲဒီဥပဒေတွေနဲ့ သန်းပေါင်းများစွာသော အမေရိကန်တွေကို ကျန်းမာရေးနဲ့ ဆေးဈေးတွေ ကူညီပေးမယ့်အပြင် ရာသီဥတုပြောင်းလဲမှုအတွက်ရော တခြားဟာတွေအတွက်ပါ အများကြီး အထောက်အကူဖြစ်လိမ့်မယ်လို့ ပြောသွားပါတယ်။

ဒါပေမဲ့ ငါတို့ကနေ့ သတင်းတွေ ရနေတဲ့ပုံစံက ငါတို့မှာ gatekeeper တွေ မရှိ၊ ကနေ့ ဖြစ်နေတာတွေကို သမိုင်းကြောင်းကို နားလည်တဲ့လူတွေက လူတွေကို ပြန်ရှင်းပြနိုင်တာမျိုး မရှိနေတဲ့အတွက် လူတွေကို သတင်းအမှားတွေ ဖြန့်ပြီး ယုတ္တိရှိရှိ အကျိုးသင့်အကြောင်းသင့် တွေးနိုင်ဖို့ထက် ခံစားချက်ကို ဗဟိုပြုစေဖို့ တဖက်က အသုံးချသွားနိုင်တဲ့အတွက် မဲဆန္ဒနယ်တွေမှာ အဲဒါက တကယ်ကို အားနည်းချက် ဖြစ်နေပါတယ်လို့လည်း ဆိုပြန်ပါတယ်။

ပြန်ပြောင်း ပြောင်းပြန်တွေ ပြောနေပါလား ဟေလာရီရယ်။ အေးလေ၊ သူက တသက်လုံး တည့်တည့်မှ မပြောဖူးတာကိုး။ သူ့စကားက သူ့ဖက်ကို လက်လေးချောင်း ပြန်ထိုးနေတာ ကြည့်ရင် မြင်ပါမယ်။ ဘိုင်ဒန်တို့ထုတ်တဲ့ ဥပဒေတွေက အလုပ်မလုပ်ပဲအစိုးရဆီက လက်ဖြန့်စားတဲ့သူနဲ့ ထောင်သားတွေကလွဲလို့ အလုပ်လုပ်တဲ့အမေရိကန်အားလုံးအတွက် ဝန်ထုတ်ဝန်ပိုးဖြစ်တာပဲရှိပြီး ဘာကောင်းကျိုးမှ မပေးပါဘူး။ (ဘာကြောင့်လဲသိချင်ရင် ကျမအရင်တင်ထားတာတွေ ပြန်ဖတ်ပါ။)

တကယ်တမ်းက တသက်လုံး လူမွှေးလူတောင် မပြောင်ပဲ နစ်သထက်နစ် လူကောင်းပြန်မလုပ်ချင်အောင် လုပ်ထားတဲ့ စနစ်ကလည်း အဲဒီလူတွေအတွက်ရော သူတို့မိသားစုတွေအတွက်ပါ မကောင်းဘူးဆိုတာ နဲနဲပါးပါး မျှော်မြင်ကြည့်ရင် သိနိုင်ပါတယ်။ ဇီးသီးဗန်းဆိုတော့လည်း အကျိုးရှိတဲ့လူတွေလည်း ရှိမှာပါ။ တရားသဖြင့်တော့ ဟုတ်ချင်မှ ဟုတ်မှာပေါ့။

ပိုဆိုးတဲအချက်က ဟေလာရီက gatekeeper တွေ လိုနေတယ်၊ ပြည်သူကို သတင်းကို ဘယ်လိုဘာသာပြန်ဆိုတာမျိုး လုပ်ချင်တဲ့ ရည်ရွယ်ချက်ပါ။ အဲဒါက ကွန်မြူနစ်တွေလို ဖြစ်သွားပါပြီ။ သူပြောတဲ့ ဂိတ်ကိပါဆိုတာ ဆင်ဆာဘုတ်လိုဟာမျိုးကို ပြောတာပါ။ ပြည်သူကို သတင်းကို သတင်းအတိုင်း မမြင်စေပဲ သူတို့လိုရာဆွဲ ပုံဖော်ပြီးမှ ရောက်စေချင်တာပါ။ သူမဒီလိုမြင်တာ အဆန်းတော့ မဟုတ်ပါဘူး။ လက်ဝဲမကြိုက်သူတွေ ဖဘမှာ ရှိနေသေးတာ၊ သုံးလို့ရနေသေးတာကို ဒီမိုကရက်အမတ်တွေ တော်တော် ဒေါပွနေလို့ လူသိရှင်ကြားကို ထုတ်ပြောနေကြတာပါ။

လက်ဝဲတွေ လုပ်လေ့ရှိတဲ့ နောက်တနည်းကတော့ စကားလုံးတွေရဲ့ အဓိပ္ပါယ်ကို သူတို့လိုချင်သလို ဖွင့်ဆိုနေကြတာပါ။ တကယ့်အတွင်းသရုပ်ကို မှေးမှိန်သွားအောင် အများပြည်သူနားလည်ရခက်ခဲ့ စကားလုံး ကြီးကြီးလှလှ တွေနဲ့ ဖုံးထားချင်တဲ့ သဘောပါပဲ။ ရည်ရွယ်ချက်ကတော့ သေချာ ဂဃနဏ ရှင်းပြလိုက်လို့ ပြည်သူတွေ သဘောပေါက်သွားရင် သူတို့ဘယ်လောက်လိမ်နေလဲ ဘယ်လောက် အသုံးမကျသလဲဆိုတာ ပေါ်သွားနိုင်လို့ နားမလည် ရှုပ်ထွေးနေအောင် ပါးစပ်နဲ့မဆန့်ပေမယ့် ပြောလို့အရသာရှိတဲ့ စကားအလုံးကြီးတွေနဲ့ ကာဗာလုပ်ထားဖို့လို့ ထင်ပါတယ်။ အဲဒါကြောင့် သူတို့နောက်လိုက်တွေကို တိတိပပ မေးလိုက်ရင် ဘာမှ မဖြေနိုင်ပဲ ဝူးဝူးဝါးဝါးတွေ ဖြစ်ကုန်တာ ဖြစ်ပါမယ်။

သတင်းလွတ်လပ်ခွင့် ဆုံးရှုံးသွားရင် ဘယ်ဘူတာဆိုက်မယ်ဆိုတာ ဒီကလူတွေ မကြုံဖူးလို့ မရိပ်မိရင်တောင် မြန်မာပြည်ဖွားတွေ ရိပ်မိဖို့ သင့်ပါတယ်။ လွတ်လပ်မှုဆိုတာ လျော့ပါး ဆုံးရှုံးပြီးရင် လွယ်လွယ်နဲ့ ပြန်မရဘူးဆိုတာ မြန်မာပြည်ကို သင်ခန်းစာယူကြပါလို့ တိုက်တွန်းပါတယ်။