ဇန်နဝါရီ ၁၁ ရက် ၂၀၂၆

အီရန်နိုင်ငံတဝှမ်းမှာ ဆန္ဒပြပွဲတွေ ပိုမိုကျယ်ပြန့်လာနေပါတယ်။ တချို့နေရာတွေမှာ ရဲ/လုံထိန်းတွေဟာ တာဝန်ကို စွန့်ပြီး ထွက်သွားတာတွေ၊ ဘာမှမလုပ်ပဲ ရပ်ကြည့်နေတာတွေ ရှိတယ်လို့ သတင်းတွေလည်း တက်နေပါတယ်။ နောက်ဆုံးသတင်းတွေအရ မီး၊ အင်တာနက်ဖြတ်ပြီး နှိမ်နှင်းမှုတွေ ပြုလုပ်လာတာ အလောင်းတွေ ထရပ်ကားတွေနဲ့ တင်ရတဲ့အထိပါပဲ။ ပြီးခဲ့တဲ့ ၃ရက်အတွင်းမှာတင် အသတ်ခံရသူ ၃၀၀၀ ကျော်သွားပြီလို့ သိရပြီး အမေရိကန်ဘက်ကလည်း ဒရုန်းတွေ တပ်တွေ ပြင်ဆင်နေပြီလို့ သတင်းထွက်လာပါတယ်။ ခါမေနီအစိုးရက ဆန္ဒပြသူတွေကို အမေရိကန်က အကာအကွယ်ပေးရင် အစ္စရေးနဲ့ အမေရိကန်စစ်အခြေစိုက်စခန်းတွေကို တိုက်ခိုက်မယ်လို့ ခြိမ်းခြောက်လိုက်ပြီး တဖက်မှာလည်း သမ္မတထရမ့်ကို ဆက်သွယ်ပြီး တွေ့ဆုံဆွေးနွေးဖို့ ကမ်းလှမ်းလာပါတယ်။ သမ္မတထရမ့်က ဆွေးနွေးဖို့ သဘောတူလိုက်ပေမယ့် မတွေ့ဆုံရသေးခင်မှာ ဖြစ်ပျက်မှုတွေပေါ် မူတည်ပြီး တိုက်ခိုက်မှု ပြုလုပ်သွားနိုင်သေးကြောင်း ကြေငြာထားပါတယ်။

မင်းသားရီဇာပါလာဗီက အရေးပါတဲ့ ကြေငြာချက်တစောင်ကို အောက်ပါအတိုင်း ထုတ်ပြန်လိုက်ပါတယ်။

“ချစ်ခင်ရပါသော အီရန်နိုင်ငံနဲ့ ရဲဝံ့တဲ့ နိုင်ငံချစ်သူများခင်ဗျား

ပြီးခဲ့တဲ့ ၂ပတ်အတွင်း (အထူးသဖြင့် ကုန်ခဲ့တဲ့ ၄ရက်မှာ) နိုင်ငံအနှံ့က သန်းနဲ့ချီတဲ့အီရန်ပြည်သူတွေရဲ့ ဆန္ဒပြမှုကြောင့် တရားမဝင်တဲ့ အစ္စလာမ်မစ်ရီပါ့ဘလစ်အစိုးရရဲ့ အုတ်မြစ်တွေဟာ ယိမ်းယိုင်လာခဲ့ပါပြီ။ အခုအချိန်မှာ ဆန္ဒပြခဲ့ကြတဲ့ သန်းချီတဲ့လူထုကြီးရဲ့ ယုံကြည်မှုကို လက်ခံပြီး နိုင်ငံအနှံ့ အုံကြွမှုကြီးရဲ့ နောက်တဆင့်ဖြစ်တဲ့ အစ္စလာမ်မစ်ရီပါဘလစ်ကို ဖြုတ်ချဖို့နဲ့ ငါတို့ချစ်တဲ့ အီရန်နိုင်ငံကို ပြန်လည်ရယူသွားကြမယ် (အောက်ပါတို့ကို ပြုလုပ်ကြမယ်)လို့ ကြေငြာလိုက်ပါတယ်။

၁။ အီရန်နိုင်ငံတွင်း – –

မြို့ကြီးတွေက လမ်းမတွေကို သိမ်းပိုက် ထိန်းချုပ်ထားရုံတင်မက အစိုးရရဲ့ လိမ်ငြာဝါဒဖြန့်ရာမှာ ပါဝင်တဲ့ အဖွဲ့အစည်းတွေ၊ အသုံးပြုတဲ့ စက်ပစ္စည်းတွေကိုပါ သိမ်းယူပြီး သူတို့ရဲ့ ဆက်သွယ်ရေးကို ပြတ်တောက်အောင် ကြိုးစားဖို့က တရားဝင်ပစ်မှတ်တွေ ဖြစ်လာပါပြီ။ အစိုးရအဖွဲ့အစည်းတွေရဲ့ ဝန်ထမ်းတွေ၊ စစ်တပ်က တပ်ဖွဲ့ဝင်တွေ၊ ရဲဖက်အဖွဲ့အစည်းက ဝန်ထမ်းတွေအနေနဲ့ ပြည်သူနဲ့ ပူးပေါင်းဖို့ နိုင်ငံတော်ဖက်ကရပ်တည်ဖို့ အခွင့်အလမ်းရှိပါသေးတယ်။ (နိုင်ငံတော်သည် အာဏာရှင် မဟုတ်ပါ။) ဒီလိုမှမဟုတ်ပဲ ပြည်သူကို သတ်တဲ့သူတွေနဲ့ တဖက်တည်း ရပ်တည်မယ်ဆိုရင်တော့ နိုင်ငံတော်ရဲ့ အရှက်တရားကို တသက်လုံး ရင်မှာပိုက်ပြီး အဆုံးမဲ့အမုန်းနဲ့ ရင်ဆိုင်ကြရမှာပါ။

၂။ အီရန်နိုင်ငံပြင်ပ – –

အီရန်သံရုံးအားလုံးနဲ့ ကောင်စစ်ရုံးအားလုံးသည် အီရန်နိုင်ငံပိုင်ဖြစ်သည်။ ဒါကြောင့် ရှက်စရာကောင်းတဲ့ အစ္စလာမ်မစ်ရီပါ့ဘလစ်အလံအစား အီရန်အမျိုးသားအလံကို လွှင့်ထူဖို့ အချိန်ကို ရောက်လာပါပြီ။

ငါတို့ဟာ ငါတို့ချစ်တဲ့တိုင်းပြည်ကို အစ္စလာမ်မစ်ရီပါ့ဘလစ်ကနေ ပြန်ယူဖို့ တံခါးဝကို ရောက်နေပါပြီ။ ခါမေနီနဲ့ သူ့အစိုးရလည်း ငါတို့ပြည်သူတွေလက်ချက်ကြောင့် အထိနာနေပြီဖြစ်လို့ သူတို့ကို အသက်ရှုချောင်မယ့် အနေအထားမျိုး လုံးဝထပ်မပေးတော့ဖို့ လိုအပ်ပါတယ်။ ခါမေနီအစိုးရမှာ လူထုကို ဖိနှပ်နှိမ်နှင်းဖို့ တပ်ဖွဲ့အင်အား လုံလောက်မှုမရှိပါဘူး။ ဟိုနားဒီနား ပစ်ခတ်တယ်ဆိုတာက အင်အားကြီးတဲ့ လက္ခဏာမဟုတ်ပါဘူး။ တိုက်ပေးမယ့် ရဲ/စစ်သည်အင်အားကလည်းမရှိ၊ အစိုးရ မြန်မြန် ဆန်ဆန် ပြုတ်ကျသွားမှာကိုလည်း ကြောက်ရာကနေ ဖြစ်လာတဲ့ တုန့်ပြန်မှုပါ။ ငါတို့ဟာ ဒီရာဇဝတ်ကောင်တွေ လက်ချက်နဲ့ ငါတို့လူငယ်သွေးတွေ ထပ်မံမြေခဖို့ ခွင့်မပြုပါဘူး။ ငါတို့ဟာ သူတို့ကို ဘာအခွင့်အရေးမှ ထပ်မပေးတော့ပါဘူး။ ငါတို့သည် နောက်ပြန်လှည့်မှာလည်း မဟုတ်ပါဘူး။ အီရန်ရဲ့ လွတ်မြောက်ရေးက နီးလာပါပြီ။ အသက်ပေးသွားတဲ့ ငါတို့ရဲ့ သားတွေ သမီးတွေရဲ့ မြေပြင်ပေါ်က သွေးတွေက ငါတို့ကို အောင်မြင်မှုဆီကို အလင်းပြခေါ်ဆောင်သွားမှာပါ။

ငါတို့က တဦးတည်းမဟုတ်ပါဘူး။ ကမ္ဘာကြီးရဲ့ ထောက်ပံ့မှုက အမြန်ဆုံး ရောက်လာမှာပါ။ ငါရဲ့ နောက်မက်ဆေ့ချ်ကို စောင့်မျှော်ပါ။ ငါတို့ဟာ ငါတို့ချစ်တဲ့ အီရန်ကို အစ္စလာမ်မစ်ရီပါဘလစ်ဆီက ပြန်ယူပြီး နိုင်ငံတဝှမ်း နေရာအနှံ့မှာ အောင်ပွဲတွေ ကျင်းပသွားနိုင်ဖို့ နီးနေပါပြီ။”

မင်းသားပါလာဗီက သမ္မတထရမ့်ဆီကိုလည်း စာတစောင်ပို့ပြီး စာထဲမှာ

“မျိုးဆက်တခုမှာ တကြိမ်သာရတဲ့ အခုလို အခွင့်အရေးမှာ အီရန်ပြည်သူတွေ လွတ်မြောက်အောင် ကူညီပေးဖို့ တောင်းဆိုပါကြောင်း၊ သူ့အနေနဲ့ အခွင့်သာတာနဲ့ အီရန်ကို အမြန်ဆုံးပြန်ဖို့ နဲ့ အသွင်ကူးပြောင်းရေးကို ဖော်ဆောင်မယ့် အဖွဲ့ဖွဲ့ဖို့ပါ ပြင်ဆင်ထားပြီး ဖြစ်ကြောင်း၊ ဒီတကြိမ်တော့ အီရန်ပြည်သူတွေ အနိုင်ရဖို့ မျှော်လင့်ကြောင်း၊ နိုင်လည်း နိုင်မှာဖြစ်ကြောင်း၊ ဘာလို့လဲဆိုတော့ အီရန်ပြည်သူတွေက လွတ်လပ်ဖို့အရေးအတွက် အသက်စွန့်ဖို့ ပြင်ဆင်ထားကြလို့ဖြစ်ကြောင်း၊ သူသည်လည်းပဲ တိုင်းပြည်အတွက် အသက်ပေးဖို့ ဝန်မလေးကြောင်း၊ ငါတို့တတ်နိုင်သမျှ အကုန်လုံးလုပ်နေတာဟာ အီရန်ပြည်သူတွေအတွက်တင်မဟုတ်ပဲ ကမ္ဘာကြီးအတွက်ပါဖြစ်ကြောင်း၊ အစ္စလာမ်မစ်ရီပါဘလစ် အစိုးရ စတက်လာကတည်းက ယူလာတဲ့ မကောင်းဆိုးဝါးတွေကို သုတ်သင်ပစ်ဖို့ပါ ကြိုးစားနေတာ ဖြစ်ကြောင်း၊ အဲဒါမှ အစ္စရေးနဲ့ အာရပ်အိမ်နီးချင်းတွေအပြင် ကမ္ဘာ့နိုင်ငံတွေနဲ့ပါ ကောင်းမွန်တဲ့ ဆက်ဆံရေး တည်ဆောင်ပြီး ငြိမ်းချမ်းတဲ့ ပတ်ဝန်းကျင်ကို ဖန်တီးနိုင်မှာဖြစ်ကြောင်း၊ ဒါက နိုင်ငံတနိုင်ငံရဲ့ ကတိကဝတ်ဖြစ်ကြောင်း” တို့ ပါဝင်ပါတယ်။